राष्ट्रवादी काँग्रेस शरदचंद्र पवार पक्षाचे आमदार एकनाथ खडसे यांच्या स्नुषा तथा रोहिणी खडसे यांच्या भावजय केंद्रीय मंत्री रक्षा खडसे यांनी पुणे रेव्ह पार्टीवर भाष्य करणे टाळले आहे. मी केंद्रीय मंत्री पदासारख्या एका जबाबदार पदावर आहे. त्यामुळे या प्रकर
.
पुण्यातील कथित रेव्ह पार्टी प्रकरणी रोहिणी खडसे यांचे पती डॉक्टर प्रांजल खेवलकर यांना अटक करण्यात आली आहे. सध्या ते न्यायालयीन कोठडीत आहेत. एकनाथ खडसे यांनी कथित हनी ट्रॅपच्या मुद्यावरून भाजप नेत्यांवर विशेषतः मंत्री गिरीश महाजन यांच्यावर टीकेची झोड उठवली होती. त्यानंतर रेव्ह पार्टीचे प्रकरण पुढे आल्यामुळे याविषयी राजकीय कटकारस्थानाचा वास येत असल्याचा आरोप केला जात आहे. या प्रकरणी संपूर्ण कुटुंब संकटात सापडले असताना केंद्रीय मंत्री रक्षा खडसे यांनी अत्यंत संयत भूमिका घेत या प्रकरणावर भाष्य करण्यास नकार दिला आहे.
सत्यता पुढे येईपर्यंत बोलणार नाही – रक्षा खडसे
रक्षा खडसे याविषयी पत्रकारांशी बोलताना म्हणाल्या, सद्यस्थितीत सर्व गोष्टी न्यायालयात गेल्या आहेत. पोलिस सुद्धा त्याची चौकशी करत आहेत. त्यात जी सत्यता आहे, ती पुढे येईल. पण मी आज केंद्रीय मंत्री म्हणून एका जबाबदार पदावर आहे. त्यामुळे कोणत्याही गोष्टीची सत्यता पुढे येत नाही तोपर्यंत मी त्यावर भाष्य करू नये असे मला वाटते. विशेष म्हणजे गत काही दिवसांपासून प्रांजल खेवलकर यांच्या अटकेनंतर खडसे कुटुंब मोठ्या तणावाच्या स्थितीतून जात आहे. त्यामुळे भाजप नेत्या रक्षा खडसे या प्रकरणी कोणती भूमिका घेतात याकडे सर्वांच्या नजरा लागल्या होत्या. पण त्यांनी या प्रकरणी अत्यंत संयत भूमिका घेऊन आपली बाजू स्पष्ट केली आहे.
विधानसभा निवडणुकीत रोहिणी खडसेंचा प्रचार करण्यास नकार
उल्लेखनीय बाब म्हणजे एकनाथ खडसे यांनी लोकसभा निवडणुकीत रक्षा खडसे यांचा प्रचार केला होता. त्यानंतर झालेल्या विधानसभा निवडणुकीत रोहिणी खडसे यांना राष्ट्रवादी काँग्रेसच्या शरद पवार गटाची उमेदवारी मिळाली होती. त्यामुळे नणंद म्हणून रक्षा खडसे यांनी त्यांचा प्रचार करणे अपेक्षित होते. पण त्यांनी भाजपची पक्षशिस्त पाळत रोहिणी यांचा प्रचार करण्यास ठाम नकार दिला. मी भाजपच्या विचारांशी बांधिल आहे. त्यामुळे मी केवळ महायुतीच्या प्रचारासाठी सक्रिय आहे. मी कोणत्याही परिस्थितीत रोहिणी खडसे यांचा प्रचार करण्याचा प्रश्नच येत नाही, असे त्या म्हणाल्या होत्या. त्यांच्या या भूमिकेची तेव्हा राजकीय वर्तुळात मोठी चर्चा रंगली होती.
रोहिणी खडसेंनी घेतली शरद पवारांची भेट
दुसरीकडे, रोहिणी खडसे यांनी आज राष्ट्रवादी काँग्रेस शरदचंद्र पवार पक्षाचे अध्यक्ष शरद पवार यांची भेट घेऊन त्यांना झाल्या प्रकाराची माहिती दिली आहे. त्यानंतर पत्रकारांशी संवाद साधताना त्यांनी या प्रकरणी योग्यवेळी योग्य प्रत्युत्तर देण्याचा इशारा दिला आहे. प्रांजल यांनी आपला पार्टीला हजर असणाऱ्या मुलींशी कोणताही संबंध नसल्याचे सांगितले आहे. आता न्यायालयात काय गोष्टी घडल्या यावर मी फार भाष्य करू शकत नाही. पण मी योग्यवेळी योग्य उत्तर देईन, असे त्या म्हणाल्यात.