भरधाव कारने दुचाकीस्वार आई मुलास धडक दिल्याची घटना विश्रांतवाडी परिसरात घडली. अपघातात गंभीर जखमी झालेल्या दुचाकीस्वार तरुणाचा दुर्देवी मृत्यू झाला.
.
मयूर रमेश पिंपळे (वय २८, रा. आनंदपार्क, भैरवनगर, धानोरी) असे मयत झालेल्या दुचाकीस्वार तरुणाचे नाव आहे. अपघातात मयूर याची आई गंभीर जखमी झाली असून त्यांच्यावर खासगी रुग्णालयात उपचार सुरू आहेत. या प्रकरणी कारचालकाविरुद्ध गुन्हा दाखल करण्यात आला आहे. याबाबत पोलीस हवालदार जितेंद्र कांबळे यांनी विश्रांतवाडी पोलीस ठाण्यात फिर्याद दिली आहे. पोलिसांनी दिलेल्या माहितीनुसार, दुचाकीस्वार मयूर आणि त्याची आई हे आनंदपार्क परिसरातून निघाले होते. त्या वेळी भरधाव कारने दुचाकीला धडक दिली. अपघातात दुचाकीस्वार मयूर याला गंभीर दुखापत झाली, तसेच सहप्रवासी आई जखमी झाली. उपचारादरम्यान मयूर याचा मृत्यू झाला. अपघातानंतर पसार झालेल्या कारचालकाविरुद्ध गुन्हा दाखल करण्यात आला आहे. पोलीस उपनिरीक्षक पद्मराज गंपले पुढील तपास करत आहेत.
दुचाकीचा वेग कमी करण्यास सांगितल्याने अल्पवयीन मुलास बेदम मारहाण
दुचाकीचा वेग कमी करण्यास सांगितल्याने अल्पवयीनाला बेदम मारहाण करण्यात आल्याची घटना भवानी पेठेत घडली. याप्रकरणी समर्थ पोलिसांकडून तिघांविरुद्ध गुन्हा दाखल करण्यात आला.
याप्रकरणी जयेश उत्तम कांबळे, सुमीत सुनील बडेकर (वय २३), हर्ष सवाणे (वय २२) यांच्याविरुद्ध गु्न्हा दाखल करण्यात आला आहे. याबाबत एका अल्पवयीनाने समर्थ पोलीस ठाण्यात फिर्याद दिली आहे. पोलिसांनी दिलेल्या माहितीनुसार, अल्पवयीन भवानी पेठेतील मंजुळाबाई चाळीत राहायला आहे. तो उपाहारगृहातून जेवण आणण्यासाठी निघाला होता. त्या वेळी चाळीत राहणारा आरोपी जयेश भरधाव वेगात दुचाकीवरुन निघाला होता. अल्पवयीनाने त्याला दुचाकीचा वेग कमी करुन हळू चालविण्यास सांगितले. या कारणावरुन त्यांच्यात वाद झाला. त्या वेळी अल्पवयीनाचा मित्र तेथे आला. आरोपी जयेश, सुमीत, हर्ष यांनी अल्पवयीन आणि त्याच्या मित्रांना शिवीगाळ केली.