सायबर चोरट्यांकडून दिवसेंदिवस सायबर गुन्हेगारी वाढून फसवणुकीचे प्रमाण वाढतच आहे. चोरट्यांनी दोन वेगवेगळ्या घटनेत ५७ लाख रुपयांची ऑनलाईन फसवणूक केल्याचा प्रकार उघडकीस आला. याप्रकरणी शिवाजीनगर आणि वारजे पोलीस ठाण्यात गुन्हे दाखल करण्यात आले आहेत.
.
याबाबत एका 32 वर्षीय तरुणाने वारजे पोलीस ठाण्यात अज्ञात आरोपी विरोधात फिर्याद दिली आहे. तक्रारदार तरुण कर्वेनगर भागात राहायला आहे. सायबर चोरट्यांनी तरुणाच्या मोबाइल क्रमांकावर काही दिवसांपूर्वी संपर्क साधला होता. ऑनलाइन पद्धतीने घरातून काम केल्यास चांगले पैसे मिळतात, असे आमिष चोरट्यांनी दाखविले. चोरट्यांनी सुरुवातीला तरुणाला एक काम दिले. काम पूर्ण केल्यानंतर त्याला पैसेही दिले. त्यानंतर चोरट्यांनी त्याला ऑनलाइन टास्कमध्ये आणखी पैसे गुंतविल्यास चांगला परतावा मिळेल, असे आमिष दाखविले. चोरट्यांनी त्याच्याकडून वेळोवेळी ४१ लाख ९४ हजार रुपये घेतले. पैसे जमा केल्यानंतर तरुणाला परतावा दिला नाही. चोरट्यांच्या मोबाइल क्रमांकावर तरुणाने संपर्क साधला. फसवणूक झाल्याचे लक्षात आल्यानंतर तरुणाने पोलिसांकडे तक्रार दिली. गुन्हे शाखेचे पोलीस निरीक्षक एस बडाख पुढील तपास करत आहेत.
कारवाईची भीती दाखवून महिलेची फसवणूक
कारवाईची भीती दाखवून सायबर चोरट्यांनी शिवाजीनगर परिसरातील एका महिलेची १५ लाख रुपयांची फसवणूक केली. याबाबत महिलेने शिवाजीनगर पोलीस ठाण्यात फिर्याद दिली आहे. चोरट्यांनी महिलेच्या मोबाइल क्रमांकावर संपर्क साधला. मुंबई पोलिसांच्या गुन्हे शाखेतून बोलत असल्याची बतावणी चोरट्यांनी केली. तुमच्या बँक खात्यातून काळ्या पैशांचा व्यवहार करण्यात आला आहे. याप्रकरणात गुन्हा दाखल करून अटक करण्यात येणार आहे. कारवाई टाळण्यासाठी मुंबई पोलिसांकडून नाहरकत प्रमाणपत्र मिळवावे लागेल. त्यासाठी तातडीने पैसे भरावे लागतील, असे सांगून चोरट्यांनी महिलेला एका बँक खात्यात पैसे भरण्यास सांगितले. महिलेने चोरट्यांच्या खात्यात वेळोवेळी १५ लाख रुपये जमा केले. गुन्हे शाखेचे पोलीस निरीक्षक चंद्रकांत सूर्यवंशी पुढील तपास करत आहेत.