राष्ट्रवादी काँग्रेस शरदचंद्र पवार पक्षाचे (NCP-SP) नेते जितेंद्र आव्हाड यांच्या पत्नी ऋता आव्हाड यांनी कुख्यात अतिरेकी ओसामा बिन लादेनची तुलना माजी राष्ट्रपती डॉ. एपीजे अब्दुल कलाम यांच्याशी केली आहे.
.
ऋता आव्हाड यांनी गुरुवारी ठाण्यातील एका कार्यक्रमाला हजेरी लावली. तिथे त्यांनी शिक्षणाचे महत्त्व या विषयावर विद्यार्थ्यांना मार्गदर्शन करताना सांगितले की, प्रत्येकाने लादेनचे जीवनचरित्र वाचावे. त्यातून तो दहशतवादी कसा बनला हे समजू शकेल.
आव्हाड म्हणाल्या, ‘जसे अब्दुल कलाम राष्ट्रपती झाले, त्याचप्रमाणे लादेनही दहशतवादी झाला. लादेन हा त्याच्या आईच्या पोटातून दहशतवादी म्हणून जन्माला आला नव्हता. समाजाने त्याला दहशतवादी बनण्यास भाग पाडले.
भाजप म्हणाला- इंडिया आघाडीच्या नेत्यांनी अफझल – कसाबचाही बचाव केला
भाजपने या विधानाप्रकरणी ऋता आव्हाड यांच्यासह राष्ट्रवादीच्या शरद पवार गटावर निशाणा साधला आहे. भाजपचे प्रवक्ते शेहजाद पूनावाला यांनी X वर लिहिले, ‘राष्ट्रवादीच्या शरद पवार गटाचे नेते जितेंद्र आव्हाड यांच्या पत्नीने ओसामा बिन लादेनचे कौतुक केले आहे. त्यांनी त्यांची तुलना एपीजे अब्दुल कलाम यांच्याशी केली. जितेंद्र आव्हाड यांनी इशरत जहाँ (लष्कर-ए-तैयबाची दहशतवादी) हिचा बचाव केला होता. INDI आघाडीतील नेत्यांनी यापूर्वी याकुब, अफझल, सिमी, कसाब आणि इतरांचाही बचाव केला आहे.
ऋता आव्हाड यांचा खुलासा, म्हणाल्या- विधानाचा विपर्यास केला
या प्रकरणी टीकेची झोड उठल्यानंतर ऋता आव्हाड यांनी आपल्या विधानावर स्पष्टीकरण दिले. त्या एका व्हिडिओ संदेशात म्हणाल्या, “विद्यार्थ्यांना प्रोत्साहन देण्यासाठी आणि त्यांना शिक्षणाचे महत्त्व पटवून देण्यासाठी मी दोन भिन्न व्यक्तिमत्त्वांची दोन उदाहरणे दिली, परंतु माझ्या विधानाचा विपर्यास करण्यात आला.”
ऋता पुढे म्हणाल्या, ‘माझ्यासमोर तरुण विद्यार्थी बसले होते. मी त्यांना मोबाईल फोन सोडून अब्दुल कलाम यांची पुस्तके वाचण्यास सांगितले. मी त्यांना ओसामा बिन लादेन दहशतवादी का झाला? हे देखील वाचण्यास सांगितले.
ऋता म्हणाल्या, ‘जेव्हा आपण रामायण वाचतो तेव्हा रावणाबद्दलही वाचतो. तो तिथे होता म्हणून रामायण घडले. मी म्हणाले की आपण आपले जीवन कसे घडवायचे हे आपल्या हातात आहे. मात्र, माझे विधान पूर्ण दाखवण्यात आले नाही.